رواية بعد النهاية(الفصل الأول إلى السابع) بقلم يسرا جمال
المحتويات
التالي جلسا معا ينهيان بعض الأمور بالمكتب قبل الذهاب الى الشركة
أخرج فؤاد هاتفه
تامر إنت هتكلم مين
فؤاد هكلم شريف أبلغه بموافقة دارين
تامر لا متعملش كده
فؤاد ليه
تامر هو اللي هيموت ويتجوز دارين مش إحنا اللي هنموت ونجوزهالوا
فؤاد وبعدين
تامر خليه هو يسألك النهاردة رأيك إيه
فؤاد باقتناع عندك حق يلا نفطر
تامر أنا مش هفطر مع الإنسانة دي هروح أفطر برا وبعدها هطلع على الشركة
فؤاد وبعدين بقى مش هتبطلوا المعاملة اللي بينكوا دي
تامر والله هي اللي إنسانة مستفزة
فؤاد خلاص خلاص هتتخانق معايا أنا
تامر لا معاك ولا معاها سلام
ونهض تامر مغادرا
اتجه فؤاد إلى طاولة الطعام فوجد دارين جالسة
فؤاد صباح النور حبيبة قلب بابا
وطبع قبلة على خدها
دارين بإبتسامة صباح النور يا بابي
جلس فؤاد إنتي خارجة بعد الفطار
دارين آه رايحة النادي
فؤاد طب خودي بالك من نفسك
دارين حاضر
_____________________________________
تناولوا الفطور
عائشة أنا نازلة سلام
هناء بسرعة كده كملي أكلك
عائشة لا تمام أنا شبعت وبصراحة مش عاوزة أتأخر
هناء طيب يا حبيبتي سلام
وفتحت الباب لتغادر فوجدت رامي يغادر شقته هو الآخر
عائشة صباح الخير
رامي صباح النور ظابطة مواعيدك معايا ولا ايه
عائشة لا انا طول عمري بنزل بدري انت اللي اول مرة تنزل بدري يعني
رامي ورايا كام مشوار وبعد كده على الجامعة
عائشة تمام
رامي مش عاوزين حاجة اجبهالكوا معايا
عائشة لا دي تسأل فيها جدتي بقى
رامي تمام هطلعلها بالمرة سلام
عائشة سلام
وغادرت عائشة الى جامعتها
__________________________________
دخل فؤاد إلى مكتبه فوجد شريف ينتظره
وقف شريف ليستقبل عمه
فؤاد إزيك يا شريف
شريف الحمد لله إزيك إنت يا عمي
فؤاد الحمد لله اقعد اقعد
وجلس شريف
فؤاد خير يا شريف إيه سر الزيارة
شريف كان في موضوع فتحناه إمبارح يعني وكده
فؤاد متظاهرا بالنسيان موضوع إيه
ارتبك شريف كثيرا الموضوع يا عمي أنا طلبت إيد دارين إمبارح
فؤاد وهو يحاول إثارة قلق شريف ههههههه يخرب عقلك يا شريف تطلب إيديها إمبارح وتيجي تسمع الرد النهاردة
شريف هي دارين رفضت
قالها بقلق
فؤاد أنا مقولتش كده بس إنت متسرع اوي كأنك مش ناوي تديها فرصة للتفكير
شريف يعني هي محتاجة فرصة للتفكير
فؤاد هي مدتنيش إجابة واضحة بس قالتلي إنها محتاجة تتكلم معاك الأول ويعد كده هتقرر
شريف بفرحة أوي أوي حدد الزمان والمكان
فؤاد لا أنا مبفضاش أخرج يا شريف وإنت عارف فخلي المقابلة عندنا في الفيلا وأنا هكون فاضي الليلة لكن لو وراك حاجة نأجلها
قال شريف سريعا لا لا أنا فاضي ولو مش فاضي هفضى
فؤاد ههههههه طيب يبقى معادنا الليلة
شريف اتفقنا
ونهض شريف وغادر وشعر فؤاد براحة كبيرة
___________________________________
استأذن من عمله وذهب لبناء الشركة ليقابل رئيسها لم يبالي كثيرا عندما أخذ إذن أنه من الممكن أن يطرد لكنه تفاجأ أن المدير وافق حتى لو بطريقة غير لائقة كالعادة لكنه استبشر بالخير فطالما ذلك المدير العجيب قد وافق فلا بد أن هناك سعادة تنتظر
جلس ينتظر دوره وهو يتخيل نفسه يتقدم بالإستقالة إلى مديره وهو يشعر بفرحة الإنتصار عليه
قاطعه صوت السكرتارية يا أستاذ
انتبه نعم
_اتفضل دورك
نهض وهو يشعر بالتوتر لكنه هدأ من روعه وأخذ نفسا عميقا وجلس يجيب عن بعض الأسئلة وانتهت المقابلة بنجاح كان يشعر أنه سيقفز فرحا عندما أخبروه أنهم ينتظرونه بالغد ليستلم وظيفة لديهم لا يدري إن كان فارس قد تدخل في الأمر أم لا لكنه حقا كان سعيد لأنه سيترك تلك الشركة التي لا تحترم موظفيها
___________________________________
كانت دارين تجلس وهي تشعر بالغيظ من كلمات صديقتها تالا
تالا بتكبر أنا وائل طلب إيدي وأنا بصراحة مش عارفة أرد عليه بإيه هو مركز كبير الصراحة بس بابي قالي فكري كويس وأنا بصراحة ناوية أفكر لإن في غيره أعلى منه وبرضو هيموتوا عليا
لارا معقوله ترفضي وائل يا تالا
تالا وائل ميفرقش معايا اصلا ومش أول ولا أخر واحد أرفضه
لارا تغمز لها يا جامد
تالا قاصدة أن تجعل دارين تشعر بالغيظ وإنتي يا دارين محدش طلب إيدك من بعد أخر عريس اللي أخوكي طحنه لما مد إيده عليكي
ثم تظاهرت بالأسف آه أسفة نسيت إنك مبتحبيش تفتكري الموضوع ده وإنكم مبتحبوش الحاجات دي تطلع برا عموما اتطمني سرك في بييييير
لارا ربنا يصبرك يا دارين
تالا عموما لو حسيتي بالوحدة اشتغلي
لارا تشتغل إيه هي بتعرف تعمل كوباية شاي أصلا
هنا ضحكت دارين بشدة الهوانم مبيتعلموش الحاجات دي لإن ببساطة في كتير يعملو الحاجات دي ميتعلمش الحاجات دي إلا اللي محتاج
قصدت استفزازهم بتلك الجملة
تالا آه فعلا والجميلات كمان مبيتعلموش
دارين آه طبعا وده سبب تاني
تالا إنتي شايفة نفسك جميلة
دارين بثقة عالية جدا طبعا
تالا لو كنتي جميلة كانوا العرسان جريوا وراكي
دارين بعد لحظات صمت امسكت كوب العصير وارتشفت منه القليل وأعادته مكانه على الطاولة
دارين فاكرين شريف
تالا شريف مين
لارا قصدك شريف اللي كان بييجي النادي وبيلعب تنس
دارين هو
لارا ماله
دارين اسمه على فكرة شريف الحكيم
تالا ابن عمك
دارين بالظبط وطلب إيدي من بابا
تالا مستحيل طبعا
دارين إيه اللي مستحيل بقولك طلب إيدي و وافقت كمان
لارا معقولة
دارين هههههههههههه متستعجلوش هعزمكوا على فرحي
صمتت كل منهما ونظروا إلى بعض بغيظ فشريف كان معروف أنه شاب رائع منذ أن كان مشتركا في النادي وذلك الذي جعل دارين تسعد عندما وجدت الغيرة في أعينهم
__________________________________
دخل إلى مكتب مديره فغضب المدير
_أنا وافقت على الاستئذان مش تقضيلي اليوم برا الشركة
شادي متعصبش نفسك يا فندم
_يعني إيه معصبش نفسي
شادي يعني أنا هريحك وأريح نفسي
_قصدك إيه
وضع شادي الاستقالة على مكتب مديره بغضب
_
_ولا هتأثر بيك واتفضل امشي
شادي كلمة أخيرة يا سيادة المدير لما تفكر تفتح شركة اتعلم إزاي تخلي الموظفين عندك يضحوا براحتهم في سبيل إن الشركة تنجح مش تعلمهم إزاي يتمنوا يلاقوا شغل تاني
ثم أردف إنت خسرتني بسبب أسلوبك في التعامل ومش بعيد تخسر باقي الموظفين لو أسلوبك متغيرش و لو كان في حد بيشتغل هنا فلأنه محتاج ومش لاقي شغل حاليا لكن أول ما هيلاقي هيسيبك ويمشي وهتكون الفرحة مش سيعاه سلام يا سيادة المدير
رحل شادي وهو يشعر بالسعادة واتصل بفارس
فارس الو
شادي بفرحة إنت أجدع صاحب في الدنيا
فارس ههههههه يبقى قبلوك في الشركة صح
شادي صح
فارس مبروك
شادي الله يبارك فيك
ثم سأل فارس إنت اتدخلت في الموضوع أصل إني أتقبل بسرعة كده حاجة مش عادية
فارس اممم يعني كلمتهم عنك شوية
شادي يعني اتوصيت يا فارس
فارس لا مش للدرجادي بس المدير صاحبي وسألني عنك شوية وكلمته عنك
شادي طيب متشكر
فارس بلاش عبط بقى إنت أخويا أصلا
شادي يبتسم وإنت كمان
فارس يلا سلام علشان ورايا شغل
شادي سلام
وأغلق فارس الخط وانتبه إلى عمله
__________________________________
في المساء جلست دارين تتأنق أمام المرآة سمعت طرقات على باب غرفتها
دارين اتفضل
دخلت علياء فؤاد بيه وأستاذ شريف تحت مستنينك
شعرت بالاحراج ثم انتبهت وقالت تامر تحت
علياء لاء تامر بيه مجاش لسه من برا واتصل وقال إنه هيتأخر
دارين براحة تمام روحي إنتي
ذهبت علياء ونهضت دارين وتأملت نفسها بالمرآة ونزلت وهي تشعر بإحراج لا تدري لماذا فعادة هي ترى شريف كثيرا ربما لأنه جاء اليوم لطلب يدها وصلت للطابق الأرضي واتجهت لغرفة الصالون وفتحت الباب ودخلت والإحراج قد تملك منها عندما وقعت عيناها عليه وكان أنيقا جدا جلست إلى الكرسي المجاور لكرسي والدها
فؤاد طيب اتكلموا براحتكوا وأنا قاعد في الأوضة اللي جنبكوا
وتركهم ذهب وجلس شريف إلى الكرسي المجاور لكرسيها
شريف إزيك يا دارين
دارين بإحراج تمام الحمد لله إزيك إنت
شريف الحمد لله عمي قالي إنك عاوزة تقعدي وتتكلمي معايا
دارين آه طبيعي يعني
شريف اتفضلي أؤمري
دارين هي مش أوامر بس طالما طلبت إيدي يبقى لازم تعرف إن ليا طلبات ولازم طبعا تتنفذ
شريف أكيد اتفضلي
دارين مبدئيا أنا حياتي مش ذي حياة أي بنت وأنا شخصيا مش ذي أي بنت
شريف بإبتسامة عارف وده اللى خلاني أطلب ايدك
دارين محاولا التغلب على احراجها والتكلم يعني أنا مبحبش حاجة في حياتي قد الخروج والسفر وبكره التجاهل يعني لو شغلك أهم مني يبقى من دلوقتي تقول
شريف كوني واثقة إنك هتكوني الأهم في حياتي
دارين تمام أنا طبعا من حقي مهر أنا أختاره وأحدده
شريف طبعا
دارين أنا عاوزة مليون جنيه
صدم شريف من المبلغ الذي طلبته ولم يتكلم ليس لأن المبلغ ضخم فهو يمتلك الملايين من عمله لكن لأنه بدأ يفكر إن كان هذا المهر ماذا سيفعل بالزفاف والفيلا التي ستطلبها
دارين إيه مالك كتير عليا
شريف محاولا اخفاء صدمته لا أبدا ده حقك تطلبي اللي إنتي عوزاه كملي
دارين مش لما اسمع ردك على أول طلب
شريف بعمى الحب موافق
دارين تبتسم تمام طبعا إحنا مفيش بنا خطوبة لإن الخطوبة للتعارف وأنا وإنت ولاد عم وعارفين بعض كويس أوي بس هيكون طبعا في فترة علشان نجهز للفرح
شريف وللڤيلا كمان
دارين ڤيلة إيه
شريف بتعجب الڤيلا اللي هنعيش فيها
دارين لا متشكرة مش عاوزة ڤيلا أنا عاوزة أكمل هنا في الڤيلا اللي اتربيت فيها
شريف بإعتراض لاء طبعا مش هينفع أعيش في بيت مراتي بعد الجواز
نهضت دارين كل شي قسمة ونصيب عن إذنك
شريف ينهض استني يا دارين من فضلك
دارين نعم
شريف ممكن تقعدي
دارين بضيق ليه
شريف برجاء من فضلك
دارين تجلس وهي مصطنعة الحزن
شريف دارين إنتي ليه مش عاوزة ڤيلا خاصة بيكي
دارين أنا مش هرتاح غير في هنا يا شريف وأنا مش بجبرك ليك الحق توافق أو ترفض
شريف بس أكيد عمي مش هيوافق وهيفهموني غلط
دارين لا متقلقش أنا هشرح الوضع
شريف بعض لحظات كملي يا دارين أنا موافق
دارين تبتسم بإنتصار دي طلباتي وخلصت ممكن أطلب تاني بعدين بس دي أهم الحاجات اللي أنا عوزاها حاليا
شريف تمام يا دارين
دارين طيب عن إذنك أنا بقى هطلع أوضتي ونتقابل بكرا نرتب كل حاجة
شريف بفرحة أكيد
ذهبت دارين وهي تشعر بالإنتصار والفرحة في الوقت ذاته
وبعدها جاء فؤاد وجلس مع شريف وتحدثوا لبعض الوقت
____________________________________
لم تفكر دارين يوما ما أنها سترتبط حقا بشريف ولكنها حقا بدأت تستعد لحفل الزفاف ذلك وشريف لا يستطيع فهم كل ما تفعله أعطاها المال ولا يدري ماذا ستفعل به
وتقابلوا بعد عدة ايام في مكتب تامر
دارين خير يا تامر
تامر بضيق طلبتي مني شخص يوضبلك حفلة فرحك
دارين طب كويس إنك لسه فاكر
تامر كابحا غضبه آه الحمد لله لسه مجاليش زهايمر
شريف أنا كنت هجيب حد مكنش لازم تتعب نفسك
تامر بسخرية لا يا راجل وإحنا عندنا كام دارين ده هي واحدة
دارين تستشيط غضبا طب بدل خفة الدم دي ورينا الشخص اللي جبته يوضبلي فرحي
تامر زمانه على وصول هو عموما مش غريب وإنتي تعرفيه كويس لإنه وضبلك قبل كده حفلة
دارين مين
سمعوا طرقات على الباب دخل بعدها زياد فقد اعطاهم تامر خبر أن يدخل زياد حالما يصل
زياد حبايبي وحشتوني
دارين بفرحة آه زياد
شريف بغضب مكبوح مين ده
دارين ده زياد قريب من ناحية ماما كان وضبلي قبل كده حفلة عملتها في الفيلا بمناسبة تخرجي من الجامعة بس مقولكش يا شريف كانت حفلة تحفة
شريف واضح إنه شغال في المجال ده
دارين لاء خالص ده خريج هندسة ديكور بس فعلا بيفهم كويس في ترتيب الحفلات
شريف بغيرة أنا بقول نخش في موضوعنا علطول
جلسوا معا على الأثاث الموجود بالمكتب جلس تامر مستمع فقط وهو لا يطيق ذلك الحوار أصلا لكنه متماسك لمظهره أمام الجميع
دارين بغضب فجأة لا أنا عاوزة الحفلة في جنينة
زياد في القاعة أجمل ومش هنحتاج ترتيب كتير
دارين بغضب قولت لاء وبعدين إنت جاي هنا علشان تسمع كلامي مش أنا أسمع كلامك
زياد أنا جاي أوضب حفلتك يا دارين وكنت شايفها أجمل في فندق بس طالما عوزاها في الفيلا خلاص ذي ما تحبي
دارين تمام أنا معتمدة عليك يكون أحلى فرح
زياد إن شاء الله
دارين همشي أنا بقى
شريف هتروحي فين
دارين عندي شوية حاجات هعملها
شريف أنا كمان ماشي
تامر تمام يلا يا زياد إنت كمان امشي
زياد أكييييد
_____________________________________
بدأت التحضيرات تسير على قدم وساق وبدأت دارين تشاهد الفساتين العالمية ولم يعجبها شئ فتواصلت مع احد المصممين العالميين وشريف و زياد على تواصل متقطع
وفؤاد منشغل مع أشرف في بعض الأمور
وتامر متجاهل لكل ما يحدث إلى أن حدث شئ أغضبه
في مكتب فؤاد
تامر إنت ماشي
فؤاد عندي شوية حاجات هعملها وإنت هتعمل إيه
تامر عندي شوية شغل هخلصه و أروح
فؤاد ok
تطلع تامر إلى الأوراق على المكتب فوجد رسالة من البنك فالتفت إلى فؤاد هو في حاجة في البنك
فؤاد لاء ليه
أمسك الظرف في جواب من البنك
فؤاد غريبة أنا مروحتش البنك النهاردة حتى الكرت مش معايا مع دارين
ثم أردف بعد لحظات سيبك أكيد حاجة مش مهمة سلام
وذهب فؤاد
جلس تامر على كرسي المكتب قائلا سلام
ومازال الظرف بيده وفتحه ليقرأ ما فيه ثم هب واقفا في غضب
_نعم
وغادر الشركة في غضب و وصل إلى الفيلا ودخل مناديا
_عليااااااء
أتت مسرعة خير يا بيه
تامر روحي هاتي طلبات البيت
علياء جبتها يا بيه الأسبوع اللي فات
أخرج نقود من جيبه وناولها إياها متجاهلا كلامها بيتهيقلي دول كفايا
علياء فهمت أنه يريد ابعادها عن المنزل ايوه يا بيه
تامر استني
نظرت إليه
تامر السواق موجود
علياء لا دارين هانم بعتته مشوار
تامر طيب يلا روحي انتي
وذهبت علياء
وصعد تامر إلى الطابق الثاني ودخل إلى دارين وكانت تتحدث على الهاتف الخليوي الخاص بها وعندما رأته تهجم على غرفتها هكذا
دارين لحظة واحدة خليك معايا إيه يا تامر إزاي تدخل كده
هم أن يتكلم فأوقفته استناني شوية بتكلم أيوه يا أستاذ لا معتقدش ابعتلي وأرد عليك
تامر دارين عاوزك
دارين لحظة واحدة شوية يا تامر بتكلم مش وقته
وعادت لتحادث شخصا ما أيوه
فسحب الهاتف الخليوي منها واغلق الخط وألقاه على الفراش
دارين بغضب إنت إزاي تعمل كده إنت مجنوون
تامر أنا مجنون ولا إنتي مجنونة
دارين بغضب اطلع برا حالا يا تامر
تامر مش قبل ما أفهم الهبل اللي إنتي بتعمليه ده
دارين الله على عقلك انت
أمسكها من ذراعها بقوة فتألمت دارين
دارين ااااه سيب إيدي إنت اتجننت
تامر إنتي إمتى هتكبري يا دارين إمتى هتحسي بالمسؤولية إمتى أقدر أقول إن إنتي عندك 22 سنة إمتى فهميني إمتى
دارين تدفعه بقوة لما أنا أقدر أقول عليك إنسان متحضر
تامر وكمان بتقلي أدبك
دارين إنت اللي قليل الأدب ودخلت الأوضة من غير اذن
تامر اذن إنتي خليتي فيها اذن
دارين هو إنت حد ضربك على دماغك وجاي تطلع غلك فيا في إيه حصل إيه لده كله
تامر سحبتي كام من حساب فؤاد بيه يا دارين
ارتبكت دارين وإنت مالك وعرفت منين
تامر صدفة تقولي إيه بقى ربنا مش عاوز الموضوع ده يستخبى
دارين بقوة ويستخبى ليه ما أنا كنت هقول لبابا
تامر تقوليله إيه بالظبط إنك بتشطبي حسابه أول بأول
دارين وإنت مالك هو راضي خليك إنت في حالك
تامر خدتي الفلوس دي ليه
دارين ببرود محتجاهم
تامر في إيه
دارين ملكش فيه مش فلوسك
تامر ليا حق فيها ذي ما ليكي حق
دارين ما تأخد هو حد ماسكك
تامر هو أنا بلحق ما شاء الله حضرتك مسيطرة على فلوسنا كلها
دارين من الصبح وأنا حاسة إني هضرب حد النهاردة
نظر إليها بغضب من برودها
دفعته إلى الخارج برا يا تامر
تامر يدفعها أخر مرا يا دارين مش كفاية خدتي من شريف مليون جنيه مهر
دارين إنت اتجننت إنت بتتجسس عليا بالطريقة دي إزاي وبأي حق
تامر بحق العشرة اللي بيني وبين شريف مش علشان هموت وأعرف أخبارك يعني
دارين بإنفعال لا إنت زودتها أوي وجبت أخري معاك أنا هخلي بابا يتصرف معاك واحلم إني أسكتلك
دفعها قائلا يا شيخة ارحمينا بقى من تفاهتك واكبري
اختل توازنها فسقطت ارضا ونظرت إليه في صدمة
نظر إليها بملامح خالية من أي تعبير وانصرف
نهضت دارين وأغلقت الباب وأخرجت حقيبة صغيرة
جلسا يتناولان العشاء معا
سناء عامل ايه في شغلك الجديد
شادي بفرحة ممتاز يا ماما الحمد لله
سناء طب كنت عوزاك في موضوع
شادي ايه
سناء فاكر شقتنا القديمة
شادي مالها وايه علاقتنا بيها دلوقتي
سناء كنت بدفع ايجارها الفترة الي فاتت
شادي ينتبه ليه
سناء محتاجها يا شادي
شادي بمرح انتي ناوية تتجوزي ولا ايه
سناء هههههه لاء يا بايخ
شادي امال
سناء سيبك انا عاوزها ليه انا عوزاك تحوش فلوس علشان نأخدها تمليك
شادي نعم
سناء من غير استغراب نفذ وانت ساكت
شادي ما انا لازم افهم
سناء هتفهم بعدين
شادي تحت امرك يا ماما
سناء بحنان ربنا يكرمك
قبل يدها ويخليكي ليا يا ست الكل
____________________________________
دخل الى الفيلا
صفاء مازن تعالا
ذهب اليها خير يا ماما
صفاء انت كنت فين
مازن كنت بركب خيل
صفاء وبعدين معاك انت امتى هتقدر خوفي عليك
مازن ماما محصلش حاجة يعني ما انا ذي الفل اهو وبعدين انا كبرت على الكلام ده
صفاء بعصبية انت هتكبر عليا يا ولد
مازن بأسف لا يا ماما مقصدش
سمعوا رنين جرس الباب
صفاء افتح الباب
مازن وفين ميادة
صفاء مجتش النهاردة واضح انك مبقتش بتأخد بالك من حاجات كتير اوي
تجاهل كلامها منعا للشجار وذهب وفتح الباب ليجد دارين لم يفاجئ من زيارتها فهي تأتي نادرا
دارين ماما موجودة
مازن اه موجودة
دارين طب اوعى من وشي
سد عليها الطريق مش نتفق
دارين نتفق على ايه
مازن هتدفعي كام في الليلة
دارين ليه ان شاء الله جايا فندق
مازن ما انتي اللي قولتي على ڤلتنا فندق
دارين والله ما نقصاك يا مازن
مازن ما انا عارف هو انتي بتيجي هنا غير وانتي خلصانة
غضبت ودفعته بقوة الى الداخل ودخلت
صفاء بفرحة دارين حبيبتي ازيك
دارين بصي انا جاية هنا يومين وماشية لو هتضايقيني أمشي دلوقتي
صفاء بحزن هو انا عملت حاجة يا بنتي
دارين خلاص سبيني ارتاح
صفاء بأسى اتفضلي
وقبل ان تصعد أمسك مازن ذراعها بقوة لما مامتك تكلمك اعرفي ازاي تردي عليها بأدب
دارين تنزع ذراعها منه بقوة ما شاء الله مفضلش غيرك انت اللي يعلمني الأدب كمان
مازن ولما اخوكي كمان يكلمك اتأدبي في كلامك معاه
صفاء اسكت يا مازن
والتفت لدارين اطلعي انتي
صعدت دارين للطابق الثاني
مازن عارفة ليه عمرهم ما سألوا عليكي علشان طول عمرك حاسة بالتقصير تجاههم وعلشان كده بتيجي على نفسك علشانهم انتي بتحبيهم بجد وهما مبيفكروش فيكي حتى اللي فكرت فيكي فكرت فيكي احتياج لمكان تبات فيه لما تتخانق مع باباها او اخوها
وتركها وصعد الى غرفته
________________________________
دخل فارس الى الفيلا
ابراهيم ايه يا فارس ده بقى انا رجعت من السفر علشان اقعد معاك وانت قاعد طول اليوم برا البيت
فارس معلش يا بابا عندي شغل كتير ومشغول طول اليوم
ابراهيم شغل كل يوم لآخر النهار مش اسلوب حياة ده يا ابني
فارس معلش يا بابا انا مرتاح
ابراهيم وانا مش مرتاح ومتأكد انك تعبان
فارس يبتسم لا متخافش عليا انا كويس جدا والحمد لله انا هطلع انام عاوز مني حاجة
ابراهيم كنت عاوزك في موضوع
فارس اجله معلش يا بابا علشان انا عاوز انام
واتجه فارس الى الطابق الثاني
_____________________________________
في صباح اليوم التالي جلس شريف يتناول فطوره مع أشرف
أشرف حددتوا الفرح امتى
شريف لا لسه
أشرف لسه كتير اوي كده في التجهيزات ده انتو بقالكوا 3 شهور بتجهزوا
شريف بملل اعمل ايه كل ما نجيب حاجة في اي حاجة دارين تقول وحشة وترجعها ونجيب غيرها ده غير الفستان اللي بيتصمم ده وانا لحد دلوقتي مشفتهوش ولا اعرف شكله عامل ازاي
أشرف لازم تثق فيها يا شريف
شريف انا واثق فيها بس انا بحسها مش عاوزة تشاركني حاجة
أشرف هههههههه الستات يا ابني بيحسوا ان هما بس بيفهموا في الحاجات دي وشايفين انهم لو أخدوا رأي الرجالة يبقى مش هيخلصوا
شريف مش هيخلصوا ايه دي بقالها 3 شهور وهي لوحدها انا لو كنت معاها كنت خلصت الموضوع كله في شهر وخلصنا
أشرف ههههههههه بيتهيقلك
شريف انا خلاص اتخنقت وشلت ايدي من الموضوع علشان نبطل خناق
أشرف ايه ده انتو بتتخانقوا
شريف اه اتخانقنا ييجي 10 مرات فسبتلها الموضوع كله
اشرف احسن حاجة عملتها ايوه كده ريح نفسك
شريف ما انا كنت عاوز اريحها واتعب انا
أشرف ربنا يكرمكوا ونفرح بيكوا بقى
شريف يبتسم بفرحة يا رب
___________________________________
تامر انت بتتقابل انت وأشرف بيه كتير ليه
فؤاد ما انت عارف يا تامر بنجهز بقى لضم الشركتين وكمان في مشروع مشترك هنعمله واقفل الموضوع قبل ما دارين تنزل هي صحيح اتأخرت ليه
تامر لا ما هي مش هتنزل
فؤاد بايتة برا
تامر لاء اتخانقنا امبارح واكيد كالعادة راحت عند صفاء هانم
فؤاد واتخانقتوا ليه
تامر يعني انت مش عارف
فؤاد لاء طبعا هعرف منين
تامر يضع الملعقة وينهض قائلا ابقى اسألها بقى لما تصالحها
فؤاد وهو مين زعلها انا ولا انت
تامر تمام خليها عند صفاء هانم حتى البيت يهدا شوية
فؤاد تامر اقعد
تامر لا معلش مستعجل
وغادر سريعا
___________________________________
جلست تتناول الفطور معهم
صفاء مبتاكليش ليه يا دارين
دارين بضيق وهي تنظر لمازن الجالس بجوارها مليش نفس
مازن بسخرية ايه يا سمو الأميرة تحبي اقوم من جنبك سديت نفسك
دارين يستحسن والله
مازن والله مش عجباكي القعدة قومي ارجعي بيتك
صفاء بحدة مازن
كمال استني يا صفاء
ووجه كلامه لدارين شوفي يا دارين ده بيت والدتك وطبعا حقك تيجي ونستضيفك وكل حاجة بس ياريت تراعي ان احنا هنا برضو اصحاب بيت ولازم تحترمينا
دارين انا هنا مش ضيفة طالما ده بيت ماما
مازن يا شيخة ده انتي تحيري شوية البيت ده بالنسبالك فندق وشوية انا جاية يومين وشوية انا صاحبة بيت خير انتي ايه بالظبط
دارين موجهتلكش كلام
مازن انا هقوم اروح الكلية احسن من القعاد معاكي
دارين تبتسم بسخرية فنفس اللهجة يتحدث بها تامر ايضا
مازن لصفاء ربنا يكون في عونك
دارين تصدق يا مازن سمعت معلومة بتقول الرد على السفهاء الصمت
مازن بغضب انتي قصدك ان انا سفيه
دارين بإنتصار انا اتكلمت عنك انا بقولك معلومة بس بس اللي على رأسه بطحة بيحسس عليها
مازن بعصبية انتي قلي
كمال بحدة مازن على كليتك يلا
مازن يسحب حقيبته بسرعة و في غضب وغادر ودارين تبتسم له في انتصار واستفزاز
كمال صفاء انا ماشي
قالها والشرر يتطاير من عينيه وكأنه يقول لها ان تتصرف وتخرج دارين من المنزل قبل عودته
وغادر كمال
بدأت دارين بتناول الطعام بإبتسامة اهو كده الواحد نفسه اتفتحت
صفاء ليه بتعاملي مازن كده
دارين ببرود مسبليش اختيار
صفاء دارين ده اخوكي الصغير
دارين طب كويس يعني المفروض يحترمني
صفاء وانتي المفروض تعامليه احسن من كده
دارين انا مجتش هنا اسمع محاضرة في كيفية التعامل انا جيت هنا علشان متضايقة فأرجوكي متضايقنيش زيادة
صفاء ماشي يا دارين على الأقل قوليلي ايه المشكلة اللي خليتك تيجي
دارين بعصبية كالعادة يعني اتخانقت مع الزفت تامر
صفاء وليه بتقولي زفت ده أخوكي
دارين بعصبية كل حاجة اخوكي اخوكي ما بلاش خنقة على الصبح بقى يا ماما
صفاء طيب خلاص ممكن تهدي
دارين بهدوء طيب
رن هاتفها الخليوي
دارين الو اكيد طيب كملوا شغل في الجنينة علشان تجهز زياد فين
وأغلقت الخط وبدأت تبحث عن رقم زياد
صفاء شغل ايه اللي بتتكلمي عنه
وضعت الهاتف على أذنها وانتظرت لبعض الوقت
صفاء ما تردي عليا
دارين اصبري بقى خليني اعرف اتكلم
وبعد دقائق الو ايه يا زياد كل ده علشان ترد انت فين
زياد انا في البيت
دارين طب يلا روح على الفيلا واشرف بنفسك على العمل
زياد حاضر
دارين اعمل حسابك انا حددت موعد خلاص
زياد ممتاز امتى
دارين يوم الجمعة الجاي
زياد تمام
دارين
متابعة القراءة
