رواية الغريبة(الفصل الحادي عشر إلى العشرون) بقلم مروة
المحتويات
وسطنا.
ندى هو انتى يا بنتى لسانك دا مبيتعدلش ابدا.
نغم ليه هو انا قولت ايه غلط
نهله لا ابدا و لا حاجه.. انتى على طول بتحدفى دبش.
نغم على فكره انا مش قادره افهم لحد دلوقتى بتضايقوا ليه من كلامى.. بلاقيكم فجأه زعلتوا رغم انى ببقى بقولكم الحقيقه.
نهله طيب تعالى نخرج احنا عشان ندى تلبس.. ندوش احنا مستنينك تحت متتأخريش عشان حازم بيه متطلعش جنونته و يدينا محاضره فى احترام المواعيد.
نغم فعلا انتوا هنا فى مصر مش بتحترموا المواعيد.
نهله طيب هنبقى نيجى كلنا عندك امريكا ناخد كورس فى احترام المواعيد.. ممكن نخرج بقى عشان نحترم خصوصية البنت و تلبس.
نغم اوكى.
اخذت نهله تفكر كيف انها لا تستطيع ان تفهم هذه الفتاه فرغم نبرة سخرية نهله فى حديثها معها الا انها اخذت الموضوع ببساطه و اعتبرت ان نهله تقول حقيقه عليها تقبلها فهل هذا هو مبدأها بالفعل فهى تتقبل ان يفعل الاخرين معها ما تفعله معهم هل هذه طبيعتها و هى لا تتعمد ان تضايق احدا. قررت نهله ان تتابع نغم عن قرب فربما تكون تربيتها بالخارج هى ما جعلتها تختلف عن الجميع هنا و تفتقر لروح المجامله و مراعاة مشاعر الاخرين.
نزلا معا و اخبرا حازم و فارس للتجهيز لنزول ندى. أطفأوا الأنوار و جعلا الردهه مظلمة تماما.
نزلت ندى بعد دقائق قليله لتفاجأ بهذا الظلام الحالك. كانت تنزل بهدوء خوفا من ان تفقد توازنها او تسقط عن الدرج. بمجرد نزولها اخر سلمه فوجأت بالأنوار تضاء و سمعت الجميع يقولون سيربرايز surprise.
فوجأت ندى بالزينه و التجهيزات و قالب الكيك الذى يحمل صورتها الموضوع على المائدة فرحت كثيرا بهذه المفاجأة فقد توقعت ان ينسى الجميع عيد ميلادها فى خضم ما مروا به من اشياء منذ وفاة جدها منذ فتره بسيطه.
هنئها الجميع بعيد ميلادها و طلبوا منها ان تقترب من قالب الكيك لتطفئ الشمع و تتمنى امنية و تقطع الكيك.
فى هذا الوقت دق جرس الباب. توجه حازم ليفتح الباب بنفسه ففوجأ بشاب فى الثلاثين من عمره تقريبا طويل ممشوق القوام قوى البنيان. وسيم ابيض البشره صاحب عيون عسلية و يتمتع بقدر كبير من الوسامه و الرجول بالإضافه إلى ان مظهره يدل على اهتمامه الكبيره بملابسه و مظهره الخارجى.
الشاب مساء الخير.
حازم مساء النور.
الشاب نهله موجوده
حازم لنفسه مين دا كمان هو الواحد لسه خلص من الاهبل بتاع القماش لما يطلعلى دا كمان. يا ريتها كانت فضلت بالنظاره و الباجى.
الشاب عاوز اقابل نهله لو موجوده.
حازم و مين حضرتك و عاوزها فى ايه
الشاب انا ادهم.
سمعت نهله اسم ادهم فكانت قريبه إلى حد ما من الممر المؤدى لباب الفيلا عندما سمعت انه ادهم صرخت ادهم.
و جرت مسرعه إلى الباب.
ما ان سمعت ندى اسم ادهم حتى شعرت ان الدنيا تلف بها و ان قلبها يسقط من مكانه. لم تصدق اذنها و لم تعرف كيف تتصرف. فى ثوانى فكرت فى اشياء كثيره معقوله يكون جاى عشان عرف ان النهارده عيد ميلادى. بس دا مقالش امبارح اى حاجه و هو بيكلمنى و محسيتش منه انه هيجى النهارده. لا لا بطلى هبل اكيد جاى عشان نهله هو ايه اللى عرفه ان النهارده عيد ميلادى. طيب يمكن نهله قالتله و اتفقوا انه يجى. بس نهله اتفاجأت انه جه.. ييي انتى مالك يا ندى اعقلى و امسكى اعصابك.
جرت نهله لتسلم على ادهم فى حين وقف حازم لا يفهم شيئا مما يدور حوله.
نهله ايه المفاجأه دى و مقولتليش ليه انك جاى.
ادهم حبيت اعملها مفاجأه.
نهله بجد مفاجأه تجنن.. تعالى ادخل انت واقف كدا ليه.
دخل ادهم مع نهله و دخل خلفهما حازم و هو مازال مندهشا و لا يفهم شيئا.
اقترب فارس من ادهم و سلم عليه بمجرد ان رأه و رحب به بشده. ظلت ندى فى مكانها لا تعلم ماذا تفعل حتى نظر لها ادهم و ابتسم.
ادهم ازيك يا ندى
ندى مبتسمه بخجل الحمد لله. انت عامل ايه
ادهم مبتسما ممتاز.
ابتسمت ندى و نظرت فى اتجاه اخر لتتفادى نظرات عيونه.
استغرب حازم ما يدور حوله من هذا ادهم الذى يعرفه الجميع و يرحب به. حتى قطعت حيرته نغم التى كانت تشعر بنفس جهل حازم بالموقف.
نغم موجهة كلامها لنهله ايه يا نهله مش هتعرفينا بضيفك.
نهله معلش اسفه الفرحه نستنى. دا ادهم ابن خالتى.
حازم محدثا نفسه اول مره تعملى حاجه عدله فى حياتك يا نغم. ادينا عرفنا مين هو الاستاذ ادهم.
سلمت نغم عليه و رحبت به.
حازم اهلا ادهم.. انا اسف معرفكش.
ادهم انا اللى اسف انى مفهمتكش انا مين.
حازم لا حصل خير واضح انك مشهور هنا و الكل عارفك.
ادهم انا اعرف فارس و ندى كانوا كلمونى مره مع نهله و هى بتكلمنى.
حازم لنفسه هى الهانم بتكلمك على طول كمان.. لسه مخلصناش من واحد بقوا اتنين.. و الله يا ست نهله طلعتى مش قليله و انا اللى اهبل.
نهله تعالى نطفى الشمع عشان عيد ميلاد ندى عشان كنا هنطفيه لما رنيت الجرس.
ادهم متصنعا الدهشه ايه دا هو النهارده عيد ميلاد ندى! كل سنه و انتى طيبه يا ندى.
ابتسمت ندى قائلة و انت طيب.
اقتربت نهله من ادهم لتحدثه بصوت واط لا يسمعه غيرهما.
نهله انت هتستهبل عليا.. يعنى هى مش قايلالك.
ادهم بصوت واط ايضا لا.. بس مامتك كان بتحكى لماما فسمعتهم.
نهله ااااااااااه.. قولتلى بقى.
ادهم اتلمى و اقفلى بقك دا شويه.
نهله ليه خايف من ايه
ادهم مش خايف من حاجه يا خفيفه بس مش عايز احرجها قدام ولاد خالها.
نهله حساس اوى.. و انا اللى قولت بنت خالتك وحشتك و جاى تطمن عليها.
ادهم طيب ما دى احد الاسباب.
نهله اسكت خلاص اتكشفت.. و تعالى نطفى الشمع.
كان حازم يلاحظ التهامس بين نهله و ادهم و يسيطر على اعصابه بصعوبه فهو لا يدى ما الذى يقولانه.
اقترب الجميع من المائده ليغنوا لندى Happy Birthday to you و يقدموا لها التهانى و الهدايا.
انهوا الاغنيه و اقتربت لتطفئ الشمع فقاطعها ادهم قائلا اتمنى امنيه الأول.
فإبتسمت له و اغمضت عيونها لتتمنى امنيه ثم نفخت فى الشمع لينطفأ.
نهله هامسة لأدهم بتريقه فظييييييييع.. رومانسى اوى.
ادهم بغيظ انتى هتستلمينى.. ما تلمى الدور بقى بدل ما استلمك انا كمان.. امال فين
صحيح النظاره و الباجى.
نهله لم نفسك.
ادهم اسكتى و خليكى اليفه هسكت.
نهله ماشى.
و ضحكا الاثنين.
جاءت واحدة من الخدم لتقطع قالب الكيك لتعطى الجميع.
ذهب الجميع إلى الصالون ليجلسوا سويا.
ادهم مامتك زعلت اوى لما عرفت انك مش هتقدرى تسافريلها النهارده و هتسافرى بكره فقولتلها انى هسافرلك و اخدك معايا.
نهله كويس انا اول ما شوفتك قولت هسافر معاك النهارده ملهاش لازمه اؤجلها لبكره.. انا اللى خلانى اؤجل السفر انى قولت مسافرش بليل لواحدى.
حازم و ايه اللى يسفركم انتوا الاتنين متأخر ممكن ادهم يفضل معانا و تسافروا بكره.
نهله لا كدا احسن انا ما صدقت ان ادهم موجود و هيسافر معايا لأن ماما وحشتنى اوى.
لم يرد حازم و اكتفى بأن هز رأسه.
حازم و انت بتشتغل ايه يا ادهم.
ادهم انا مهندس بس للأسف الشركه عندنا استغنت عن كتير من الموظفين و انا دلوقتى بدور على شغل.
ندى ادهم كاتب كمان.
نظر لها ادهم و ابتسم فخجلت و دورت وجهها.
حازم و الله.. طيب و بتكتب ايه
ادهم شعر و روايات.
حازم ليك اعمال منشوره
ادهم للأسف لسه بس بحاول.
حازم ربنا يوفقك.
ادهم نهله قومى جهزى نفسك عشان منتأخرش فى السفر.
نهله اوكى.
قامت لتغادر الغرفه ثم التفت لندى و حدثتها.
نهله ندوش حبيبتى.. ممكن اتعبك معايا تفرجى ادهم على الجنينه بعد ما عملت فيها شوية شغل.. انا لسه بشتغل فيها يا ادهم بس شوفها دلوقتى عشان لما اخلصها خالص تعرف الفرق.
فارس خليكى انا ممكن اوريهاله.
لأول مره تشعر نهله انها تريد ان تضرب فارس.
نهله لا يا فارس انا عاوزاك فى موضوع تعالى معايا.. روحى انتى يا ندى لو سمحتى.
ابتسم لها ادهم فغمزت له و اخذت فارس و صعدا إلى غرفتها. لم تعرف ماذا تقول له فأخذت تعرض عليه ما وصلت إليه فى الرسم من مراحل.
خرجا ادهم و ندى إلى الحديقه كانت ندى تشعر بخجل كبير فهذه أول مره تكون مع ادهم فى الحقيقه فقد اعتادت ان تكلمه دون ان يراها او ينظر فى عينيها.
ادهم كل سنه و انتى طيبه.
ندى و انت طيب. كنت عارف ان النهارده عيد ميلادى.
ادهم سمعت خالتو بتقول لماما الصبح بالصدفه فقررت اجى على طول.
ندى قررت تيجى و لا خالتك بعتتك عشان تجيب نهله.
ادهم لا و الله. دا انا اللى مصدقت و عملت دى حجتى و قولتلها طالما وحشاكى اروح اجيبهالك بعد عيد ميلاد ندى.
ابتسمت له ندى.
ادهم وحشتينى اوى و وحشتنى عيونك.
نظرت له ندى بعتاب و نظرت للأسفل بخجل.
ادهم اتكسفتى ليه انا بقول اللى حاسس بيه.
ندى بس انا مش متعوده على كدا.
ادهم لا اتعودى عشان هتسمعى من دا كتير.
ابتسمت له ندى بخجل.
اخرج ادهم من جيبه علبة مستطيله و اعطاها لها.
ادهم عارف ان الهديه دى قليله اوى عليكى بس اللى قدرت اجيبه النهارده معلش الوقت مكنش فى صالحى خالص.
اخذت منه ندى العلبه بفرحه و فتحتها فوجدت انسيال من الذهب خفيف و رقيق به قلوب صغيره رغم انه بسيط جدا لكنها احبته كتير و اعجبت بذوقه كما انه اصبح عزيزا عليها لمجرد انه هديه من ادهم.
ندى يجنن.. تسلم ايديك.
ادهم مبتسما الله يسلمك يا قمر.
ندى طيب ممكن تلبسهولى.
ادهم بس كدا دا احلى طلب.
ضحكت ندى و مدت يدها ليلبسها الانسيال.
فى هذا الوقت ندهت نهله لأدهم من عند باب الحديقه.
نهله ياللا يا ادهم انا جاهزه.
ادهم اهى جت هادمة اللذات و مفرقة الجماعات.
ضحكت ندى قائلة طيب ياللا ندخل.
ادهم ياللا.
دخلا ادهم و ندى إلى الداخل كانت نهله تسلم على الجميع لتغادر. اقترب ادهم منهم ليسلم عليهم هو الأخر ثم ودع ندى كالجميع حتى لا يلفت انتباه البقيه و غادر هو و نهله.
قضت نهله الطريق كله و هى نائمه فقد حل عليها كل إجهاد الاسبوع و ظل ادهم يتذكر لقاءه بندى و ابتسامتها و خجلها.
جلسا حازم و فارس فى الحديقه يتحدثان.
حازم انتوا تعرفوا ادهم من امتى
فارس نهله عرفتنا عليه فى مره كانت بتكلم مامتها و هو اللى كان بيظبط الماسنجر لمامتها.
حازم هو قاعد مع مامتها
فارس اه.. هو و مامته قعدوا معاها لما نهله سافرت.. اصل هو و نهله متربيين مع بعض و بتعتبره اخوها الكبير و لما سافرت سابتله الارض يهتم بيها بس اللى فهمته انه مش بيحب الشغل فى الارض و بيحاول يدور على شغل تانى بعد ما اضطر يسيب شغله.
شعر حازم براحه عندما عرف ان نهله تعتبر ادهم مجرد اخ و ان هذا سبب القرب الذى شعر به بينهما و ليس شيئا اخر.
حازم طيب مقولتليش بقى بتروح فين انت و بنت عمك كل يومين و لا تلاته و تغطسوا بالساعات و محدش يعرف عنكم حاجه.
فارس ايه يا كبير انت جايبنى و مقعدنى فى هدوء و بتشربنى شاى عشان تقررنى و لا ايه.. لا الموضوع دا برايفت.. انسى انى اقول لحد عليه.
حازم اتفلق تلاقيه موضوع هايف زيك.
فارس برضو مش هتوصل منى لحاجه و مش هتعرف توقعنى فى الكلام.
حازم ماشى.
الفصل الثامن عشر
وصلا نهله و ادهم إلى المنزل. فأستقبلتيهما امها و خالتها بترحاب شديد.
الأم وحشتينى اوى يا حبيبتى.
نهله و انتى كمان وحشتينى اوى يا ماما.
الأم كويس يا ادهم انك رحت و جبتها النهارده انا كنت خلاص هتجنن.
ادهم كنت حاسس بيكى و الله.. ياللا بقى هسيبكم تشبعوا من نهله و هدخل استريح شويه.
نهله بخبث تستريح برضو.
فهى تعلم انه يريد ان يكلم ندى على الانترنت.
ادهم خليكى فى حالك.
الخاله ييييييي بقى انتوا هتبدأوا تناقروا فى بعض. خلاص ادخل يا ادهم و سيبنا نقعد مع نهله.
ادهم ما دا اللى انا قولته.
جلست نهله مع امها و خالتها تحكى لهما كل ما حدث معها منذ غادرت المنصوره بما فى ذلك موضوع احمد.
الام طيب و احمد دا شاب كويس فعلا
نهله انا معرفوش غير فى الشغل يا ماما و مش قادره احكم عليه اوى.
الام طيب و ناويه على ايه.
نهله معرفش يا ماما.
الام بس لازم تفكرى كويس عشان تعرفى تردى على الراجل.
نهله عارفه يا ماما بس مش عايزه افكر فى حاجه دلوقتى غير انى افضل فى حضنك.
قبلت الام رأسها و احتضنتها بقوه.
الخاله طيب انا هدخل انام و اسيبكم بقى مع بعض.
الأم احنا كمان هندخل ننام دلوقتى.
نهله ماما ادخلى نامى انتى و انا هقعد شويه مع ادهم عشان عاوزاه فى موضوع و بعدين هاجى انام فى حضنك.
الام طيب يا حبيبتى.
طرقت نهله باب غرفة ادهم فسمح لها بالدخول.
نهله فاضى نتكلم شويه.
ادهم
نهله كلمت ندى.
ادهم اه اتكلمنا شويه و سيبتها بعد كدا تدخل تنام.
نهله طيب ايه الموضوع بقى فهمنى.
ادهم موضوع ايه
نهله ناوى على ايه مع ندى.
ادهم انا بحبها.
نهله لحقت
ادهم انتى تعرفى عنى انى بتاع لف و دوران!
نهله انا مقصدتش كدا بس خايفه بعد كدا تحس انك اتسرعت و تكون البنت اتعلقت بيك.
ادهم ندى البنت اللى كنت بحلم بيها. من اول ما اتكلمنا و بقينا بنتناقش و بسمع رأيها و انا عرفت ان احنا بنفكر زى بعض و انها الانسانه اللى ممكن تفهمنى و اقدر اعيش معاها عقلى مقتنع بيها 100
نهله طيب و قلبك
ادهم لما ابتديت احس اد ايه هى رقيقه و حنينه و حساسه لاقيتها شدتنى ليها من غير ما احس. فى ايام قليله لاقيت نفسى بحبها و كل يوم حبى ليها بيزيد.
نهله ربنا يكتبلكم اللى فيه الخير.
ادهم يا رب.
نهله ياللا بقى انا هقوم انام عشان اصحى بدرى اروح ارضى اللى وحشتنى اوى. تصبح على خير.
ادهم مبتسما و انتى من اهله.
قضت نهله يوم الجمعه فى المنصوره بين الجلوس مع والدتها و التجول بأرضها التى افتقدتها كثيرا. تابعت القائمين على الأرض و ناقشت معهم ما سيقومون به فى فترة غيابها. استمتعت كثيرا بهذا اليوم و قررت ان تسافر صباحا عائدة إلى القاهره.
استيقظت السبت مبكرا و ذهبت لتتجول فى أرضها قليلا و لتلتقط لها بعض الصور لتريها لفارس و ندى. عند عودتها إلى المنزل لتجهز نفسها للسفر تحدثت لها والدتها.
الأم نهله.. حازم اتصل عشان يلحقك قبل ما تسافرى و بيقولك هو فى الطريق جاى ياخدك.
نهله و ايه اللى جايبه ما انا كنت هسافر لواحدى.
الأم كتر خيره بدل ما تسافرى فى المواصلات لواحدك و ابقى قلقانه عليكى.
نهله ايوا بس لازم ياخد رأيي و يشوفنى موافقه و لا لا مش يتصرف كدا من دماغه.
الأم يا بنتى الولد عاوز يريحك و نيته خير ليه تتعصبى كدا كأنه عملك حاجه وحشه.
نهله يا ماما انا اللى معصبنى ان حازم بيتصرف فى كل حاجه تخصنى بدماغه كأنى مش موجوده بيتصرف و بعدين يبلغنى و انا مش بحب كدا. المهم يا ماما انا هدخل احضر حاجتى و اجهز عشان لما البيه ييجى.
الأم طيب يا بنتى بس لما ييجى استقبليه كويس دا ضيف عندنا.
حضر حازم و جلس مع والدة نهله قليلا قبل ان يحضر الاخرين.
الأم حازم انا كنت عاوزه اسئلك على حاجه قبل نهله ما تيجى.
حازم خير يا طنط.
الأم الشاب دا اللى متقدم لنهله و عاوز يخطبها.. ايه رأيك فيه يعنى كويس و ابن ناس و يستاهلها.
شعر حازم بغضب شديد فمعنى ان نهله حكت لأمها انها تأخذ هذا الموضوع على محمل الجد و تفكر فيه بالفعل حاول السيطره على اعصابه ليكون هادئا فى رده على والدتها كى لا تشعر بشيئا من غضبه.
حازم هو عيلته معروفه بس انا مبحبوش و مبسترسحلوش.
الأم طيب ليه يا ابنى مقولتش لنهله و نصحتها
حازم نهله عارفه كويس رأيى من غير ما اقولهولها و يمكن لو قولتلها تعند اكتر.
الأم يعنى ناوى تسيبها تاخد قرار مهم زى دا غلط و تحط نفسها فى مشكله.
حازم اكيد مش هسمح لدا يحصل بس مش عايزها تحس انى بفرض رأيى عليها.
الأم طيب خلاص دلوقتى قفل على الموضوع عشان جايه هى و أدهم.
دخلا نهله و ادهم و سلما على حازم.
حازم صحيح يا ادهم المره اللى فاتت ملحقناش نتكلم براحتنا عشان كنتوا مستعجلين عشان تلحقوا تسافروا. انت تخصصك الهندسى يساعدك انك تشرف على الماكينات و العمال اللى بيصلحوها.
ادهم اه طبعا.. انا ميكانيكا باور.
حازم طيب كويس جدا.. لو عندك استعداد ممكن تيجى تشتغل معانا احنا عندنا مهندسين و عمال كتير بس للاسف مفيش حد اثق فيه يمسك القسم نفسه بتاع الماكينات و يتابعها و انت فاهم طبعا انا مليش فى الجزئيه دى فمببقاش قادر ادير القسم دا بشكل كويس.
ادهم هو بصراحه عرض رائع.. بس محتاج افكر شويه و اتكلم مع والدتى و اشوف هى ناويه على ايه و عندها استعداد تيجى معايا القاهره و لا لا.
نهله طيب و لو جت معاك.. ماما هتبقى قاعده لواحدها.
ادهم سيبينى بس اتكلم معاهم هما الاتنين الاول و اشوف هنتفق على ايه.. ما يمكن الاتنين ييجوا معايا.
نهله طيب و الارض.
حازم نهله سيبيه يشوف هو كمان مصلحته مش عشان مصلحتك هيفضل قاعد هنا و هو دور على شغل كتير هنا ملقاش فرصه مناسبه.
نهله انت فاكر انى انانيه و متهمنيش مصلحة ابن خالتى.
حازم لا مقصدتش بس بقولك تفكرى بشكل موضوعى و من كل الجوانب.
أدهم متقلقيش يا نهله.. اكيد مش هعمل اى حاجه من غير ما اطمن على مامتك و ماما.. و بالنسبه للأرض فخلاص اتفقنا ان فى ناس بتشرف عليها غيرى.. حازم شكرا على العرض اللى انت قدمتهولى دا و ان شاء الله فى اقرب وقت هعرفك قرارى ايه.
حازم ان شاء الله.. لو جاهزه يا نهله ياللا نتوكل على الله احنا و نسافر.
الأم محدش هيمشى من هنا قبل الغداء. استريح شويه و اتغدوا و بعدين تسافروا.
حازم مش عاوزين نتأخر فى السفر.
الأم و انا مش هسيبك تمشى من غير غداء.
تحركا حازم و نهله مباشرة بعد الغذاء و بمجرد ان تحركت السياره ادار ادهم المسجل على اغانى اجنبيه هادئه و رومانسيه جميله منها اغنية Vivo pour lei التى تحبها نهله كثيرا.
نهله الله انا بعشق الاغنيه دى.
ابتسم حازم لها.
بعد قليل بدأ حوار لم يكن يعرف كيف سيبدأه و لكنه فى النهايه تشجع و قرر ان يتكلم.
حازم قررتى ايه
نهله بإستغراب فأيه
حازم فى موضوع احمد.
نهله اها.. لسه بفكر.
حازم بتفكرى فى ايه.. الموضوع مش محتاج تفكير.
نهله و ليه بقى
حازم لانه مش مناسب ليكى.
نهله انا اللى اقرر اذا كان مناسب ليا و لا لا.. انت تعرف عنه حاجه وحشه يعنى عن عيلته او اخلاقه.
حازم بعصبيه لا بس هو اى حد كويس و عيلته كويسه تقبلى بيه.
نهله وارد جدا طالما ان الشخص كويس و عيلته كويسه ان البنت تقبل بيه.
حازم متوافقيش.
نهله ليه
حازم متوافقيش و خلاص.
نهله دا يعنى عشان حضرتك قررت كدا.. زى ما قررت انه ميتكلمش معايا فى اى شغل و لا يجيلى فى الشركه من غير حتى ما تعرفنى.. و زى ما قررت انك تيجى تاخدنى من غير حتى ما تكلمنى و تعرف رأيى.. المهم رأيك فى كل حاجه و انا صفر على الشمال ملوش لازمه.. مش كدا
حازم لا.. مش كدا.
نهله امال ايه
سكت
عندما لم يتكلم انهت نهله الحوار بجمله حاسمه و بسيطه.
نهله ريح نفسك يا حازم.. مش هرفضه الا اذا كان عندك سبب وجيه تقولهولى.
بعد هذا الحوار ظلا صامتين طوال الطريق دون اى كلمه و بمجرد وصولهما الفيلا صعدت نهله إلى غرفتها حتى لا تحدث بينهما اى مشاحنه.
استقبلاها ندى و فارس بحماس كبير و نغم استقبلتها بإبتسامة ترحيب و سألتها ما إذا كانت استمتعت بأجازتها. جلست نهله معهم تحكى لهم كيف قضت الأجازه فى المنصوره و تريهم صور الأرض التى التقطتها. طلب منها فارس ان يأخذ هذه الصور. استغربت طلبه و لكن وافقت و اعطته الصور.
نزل الجميع لتناول العشاء و قضوا جميعا سهره جميله امام احدى المسرحيات. ثم طلب حازم من نهله ان تذهب معه للمكتب ليتحدثا قليلا.
نهله خير يا حازم.
حازم فى صفقه مهمه بالنسبه لنا محتاجين ان احنا نحاول ان احنا نعملها.
نهله صفقة ايه
حازم صفقة ملابس.
نهله مش قماش المره دى.
حازم لا.. انتى عارفه ان احنا مش بس بنصنع الملابس كمان بنستورد بعض الملابس.
نهله اه.. تمام. طيب انا ايه اللى مطلوب منى
حازم الصفقه دى مع شركه تركيه و طبعا لأن احنا اللى مقدمين العرض و حابين نتعامل معاهم فأحنا اللى هنسافر.
نهله احنا مين.. قصدك انى مسافره معاك.
حازم ايوا و انا خليت السكرتيره بتاعتك تبتدى تمشى فى اجراءات السفر لأننا المفروض نسافر الخميس الجاى.
نهله بسخريه مفيش حاجه بتتغير.. برضو بتاخد القرار و بعدين اعرف بيه.
حازم دا قرار يخص الشغل و طبيعى انى اخده و بعدين اعرفك بيه.
نهله بسخريه اهااااااااا.. فهمت.
حازم يا ريت تجهزى نفسك على اننا هنقعد هناك 3 أيام.
نهله اى اوامر تانيه.
حازم دى مش اوامر.. و لا مفيش طلبات تانيه.
مر يومان و جاء اتصال من ادهم لحازم يخبره انه سعيد بقبول عرض العمل الذى عرضه عليه.
اتصلت نهله بأمها لتستفهم منها عن الامور.
الأم اهلا حبيبتى ازيك
نهله الحمد لله يا ماما.. انتم عاملين ايه
الأم بخير الحمد لله.
نهله الحمد لله.. ماما انا عرفت من حازم ان ادهم وافق على الشغل. طيب اتفقتوا على ايه انتى و هو و خالتو
الأم انا و خالتك واخدين على هنا و مش هنقدر نسافر. هو هيجى القاهره لواحده و حازم قاله ان هو هيلاقيله مكان للسكن.
نهله طيب يا ماما.. ان شاء الله خير.
الأم ان شاء الله يا حبيبتى.
مر الاسبوع بنفس الروتين المعتاد. وفر حازم لأدهم شقه صغيره قريبه من الشركه يخصم ايجارها من مرتبه. و تقرر ان يبدأ ادهم العمل أول الشهر أى بعد عودت ادهم و نهله من السفر بحوالى اسبوع
الفصل التاسع عشر
وصلا نهله و حازم إلى تركيا بعد رحلة طيران صامته الا من بعض الكلمات البسيطه.
حازم حمدا لله على السلامه.
نهله الله يسلمك.
حازم دلوقتى هنروح الفندق لأن الوقت مش هيسمح انى افسحك و اوريكى البلد.
نهله احنا اصلا مش جايين نتفسح.
حازم ايوا بس طالما جينا اكيد هنلف شويه فى اسطنبول.
ركبا سياره من المطار إلى الفندق الذى حجز فيه حازم لهما. صعدا إلى الدور الذى به غرفهم.
حازم دى أوضتك و انا أوضتى اللى جنبها دى. و لو عايزه اى حاجه كلمينى فى التليفون هجيلك على طول.
نهله اوكى.
حازم بعد ساعه هننزل عشان العشاء.
نهله عشان حضرتك قررت انى هجوع بعد ساعه.
حازم بإبتسامه مستفزه لا لأن دى مواعيد العشاء هنا فى الاوتيل.
فتح كلا منهما غرفته و دخلها. اعجبت نهله بغرفتها فقد كانت جميله و تطل على البحر فأستمتعت بالمنظر كثيرا. ارتاحت قليلا ثم بدلت ثيابها و مر عليها حازم لينزلا لتناول العشاء و دار بينهما حوارا قصيرا.
حازم بكره الاجتماع هيبقى الساعه 10 الصبح ان شاء الله.
نهله اوكى هبقى جاهزه من 9.
حازم تمام.. تقلى فى لبسك و انتى خارجه عشان الجو هنا برد.
نهله و اعمل ايه تانى
حازم انا بنصحك لمصلحتك.
نهله شكرا.
حازم هو انتى ليه طريقتك كدا.. لما حد بيعمل معاكى حاجه كويسه المفروض تتعاملى معاه كويس.
نهله متعودتش ان حد يعمل واصى عليا.
حازم انا بحاول اساعدك.
نهله لو المساعده دى معناها انى الاقيك بتتدخل فى كل شئونى مش عاوزاك تساعدنى.. انا من صغرى و انا متحمله مسئولية نفسى و بعرف اخد قراراتى و افكر كويس مش محتاجه حد لا يفكرلى و لا يقررلى.
حازم انا اسف لو شوفتى دا تدخل بس انا كل اللى قاصده عشان اساعدك.
نهله عاوز تساعدنى اتعامل معايا على انى زيي زيك لانك بكدا هتريحنى و سيبنى انا اتصرف فى حياتى براحتى. و متخدش اى قرار يخصنى من غير ما تسألنى الأول.
حازم أى أوامر تانيه.
نهله لا شكرا.. انا عاوزه اطلع انام عشان اعرف اصحى بكره بدرى.
حازم اطلعى.
نهله و انت مش طالع.
حازم لا.
نهله رايح فى حته.
حازم هسهر الواحد مبيجيش اسطنبول كتير و ليله زى دى مينفعش اضيعها.
شعرت نهله بالغيظ من كلام حازم و ارادت بشده ان تعرف اين سيسهر و مع من. هل له اصدقاء فى تركيا هل ستكون هناك بنات فى هذه السهره اسئلة كثيره شغلت بالها و هى وحيدة بغرفتها حتى استسلمت اخيرا للنوم.
غضب حازم كثيرا من طريقة نهله معه فهو لم يقصد ان يفرض سيطرته عليها و لكن هذه هى طريقته فى الاهتمام بمن يخصه من اشخاص.
تمشى حازم قليلا بالقرب من الفندق ثم عاد لينام تعمد الا يخبر نهله بعودته لتعتقد انه سهر لمدة طويله.
استيقظت نهله و جهزت نفسها للاجتماع و بدأت تراجع بعض الاوراق. تأخر حازم خمس دقائق عن ميعاده متعمدا ذلك فاتصلت به نهله.
نهله ايوا يا حازم.. اتأخرت ليه عاوزين نلحق الاجتماع.
حازم طيب قولى صباح الخير الاول.
نهله صباح الخير.. ايه اللى اخرك.
حازم سهرت جامد امبارح فراحت عليا نومه.
احست نهله بغيظ من رده فما الذى يجعله يتأخر فى السهر فى بلد اخرى و هو لا يفعل ذلك فى بلده.
نهله طيب قدامك اد ايه و تخلص.
حازم هلبس بسرعه و عشر دقايق و اعدى عليكى.
انتظرته نهله و هى تتسائل يا ترى ما الذى جعله يتأخر كل ذلك. بعد قليل مر عليها.
حازم انا مش قولتلك تتقلى شويه فى لبسك.
نهله لا مش برد و لا حاجه و انا لابسه كويس و بطل تفرض رأيك عليا. و بعدين قول صباح الخير الاول.
حازم عادى ما احنا قولنا صباح الخير فى التليفون.
نهله طيب يالا نمشى عشان منتاخرش.
حازم يالا.
ذهبا معا إلى الاجتماع الذى مر بنجاح كبير مما جعلهما يخرجا سعيدين منه.
حازم الحمد
متابعة القراءة
